SERIKALI YASITISHA MCHAKATO WA MABADILIKO SIMBA NA YANGA

Katibu mkuu wa BMT, Mohamed Kiganja

Na: Imani Kelvin Mbaga

Serikali kupitia Baraza la Michezo la Taifa (BMT), imesitisha michakato yote ya ubadilishaji wa umiliki wa vilabu vya wanachama hususani Simba na Yanga ambavyo kwa siku za karibuni vimekuwa kwenye mchakato wa kubadilisha umiliki kwa Simba kujiendesha kwa mfumo wa hisa na Yanga kujiendesha kwa mfumo wa kukodishwa.

  Akitoa taarifa hiyo mbele ya waandishi wa habari leo jijini Dar es salaam, katibu mkuu wa BMT, Mohamed Kiganja alisema hadi hivi sasa kumekuwa na malalamiko mengi juu ya michakato hiyo kutoka kwa baadhi ya wanachama hadi kufikia hatua ya kupelekana mahakamani kitu ambacho ni hatari kwa amani ya taifa letu.

  Kwa mujibu wa taarifa rasmi ya serikali iliyosomwa mbele ya waandishi wa habari na katibu mkuu huyo, marufuku hiyo inaendana na agizo kwa vilabu kufanya marekebisho ya katiba zao kwa mujibu wa sheria ya Baraza la Michezo la Taifa na kanuni za msajili Namba 442 Kanuni ya 11 Kifungu kidogo cha (1-9)

   Baraza limesema linapenda kuona wahusika wanafuata sheria za nchi katika kutimiza malengo yao na kwamba kuendelea na mchakato huo bila kufuata utaratibu na kufuata sheria za nchi ni kosa na hatua stahiki zitachukuliwa kwa yeyote atakayekiuka maagizo hayo.

   Baada ya hatua ya kutoa tamko la usitishwaji huo Baraza la Michezo la Taifa litapeleka barua kulitaarifu shirikisho la soka nchini (TFF) kuhusu agizo hilo kwa wanachama wao.

  Klabu ya Simba tayri ilikuwa inaendelea na mchakato wa kuandaa mazingira ya kuuza hisa ili klabu hiyo imilikiwe na Mohamed Dewj “Mo” kwa asilimia 51 ya hiosa huku wana hisa wengine wakimiliki kwa asilimia 49, wakati Yanga walikuwa na mchaskato wa kukodisha klabu yao kwa kampuni ya Yanga Ltd inayomilikiwa na mwenyekiti wa klabu hiyo Yusuph Manji.

    Kwa nyakati tofauti viongozi wa vilabu hivyo walisema hawawezi kusema chochote chochote hadi hapo watakapopata barua rasmi juu ya tamko hilo.

Katibu mkuu wa BMT (aliyevaa tai) akiongea na waandishi wa habari (hawapo pichani) leo jijini Dar es salaam