WIZARA YA ARDHI YAWEKA WAZI TARATIBU ZA UTHAMINI WA FIDIA NCHINI

Na: Imani Kelvin Mbaga

Evelyne Mugasha Kaimu Mthamini Mkuu wa Serikali

Wizara ya Ardhi, Nyumba na Maendeleo ya Makazi imetoa ufafanuzi juu ya utaratibu unaotakiwa kutumika kabla, wakati na baada ya kufanya tathmini ya ardhi na mali isiyohamishika ili kuondoa malalamiko wakati wa kulipa fidia.

Akiongea na waandishi wa habari katika ukumbi wa habari maelezo jijini Dar es salaam leo, kaimu mtathmini mkuu wa serikali, Evelyne Mugasha, alisema uwazi katika ufanyaji wa tathmini utasaidia kuondoa malalamiko kwa wananchi hasas wakati wa kufanya tathmini kabla ya kulipa fidia.

“tumefanya tathmini nchi nzima ili kujua gharama ya ardhi kwa nchi nzima, hata hivyo taratibu za kufanya tathmini ziko wazi tena zipo kisheria na siyo suala la kubahatisha, ingawa malalamiko ya wananchi wengi yanatokana na kutojua taratibu” Alisema Mugasha.

Kwa mujibu wa taarifa iliyotolewa mbele ya waandishi wa habari na wawakilishi kutoka wizara ya ardhi, nyumba na maendeleo ya makazi kitengo cha uthamini, zipo taratibu mbalimbali zinazotakiwa kufuatwa wakati wa kulipwa fidia kwa mtu yeyote ambaye ardhi yake imefanyiwa tathmini hasa pale inapohitajika kwa matumizi kama vile ya uwekezaji.

Wawakilishi kutoka wizara ya ardhi kitengo cha uthamini wakiongea na waandishi

Baadhi ya mambo ya msingi kwa mfidiwa ni kama aina mabalimbali za posho anazostahili kulipwa kama vile posho ya usumbufu, posho ya upotevu wa makazi, posho ya upotevu wa faida, posho ya usafiri ikiwa pamoja na gharama za awali za kupata ardhi.

“ULIPAJI WA FIDIA: Fidia inaweza kulipwa kwa pesa taslim au kwa mfumo wa hundi. Ulipaji hufanywa na wahasibu wa mlipaji fidia kwa kushuhudiwa na Mtendaji wa mtaa/kijiji anaye wathibitisha walipwaji fidia, Mthamini anapaswa kuwepo kushuhudia nyaraka za uthamini walizoachiwa wananchi wakti wa uthamini (mf.Fomu Na 69)” Ilisema sehemu ya taarifa hiyo.

Mugasha pia alisistitiza kuwa uthamini ni taaluma hivyo ni lazima wananchi waiheshimu na kuwaamini wathamini huku akiainisha sheria na miongozo inayoongoza taaluma na huduma ya uthamini kama vile Sheria ya ardhi No 4 & 5 za mwaka 1999, Kanuni za Sheria za ardhi za mwaka 2001, Sheria ya utwaaji Na 47 ya mwaka 1967 na Waraka Na 1 wa Baraza la mawaziri.