LWANDAMINA; NIMEKUJA KUIPA YANGA MWELEKEO MPYA

 

George Lwandamina akikabidhiwa (kulia) akikabidhiwa jezi kam isharan ya utambulisho rasmi

Na: Imani Kelvin Mbaga, Dar es salaam.

Uongozi wa mabingwa watetezi wa ligi kuu ya kandanda Tanzania bara, Yanga Sc, leo umemtambulisha rasmi kocha mkuu mpya wa klabu hiyo anaechukua nafasi ya kocha mkuu wa zamani Mholanzi Hans Van Der Pluijm anaekuwa mkurugenzi wa ufundi.

Akiongea na waandishi wa habari makao makuu ya klabu hiyo yaliyopo jangwani jijini Dar es salaam, makamu mwenyekiti wake Clement Sanga alisema lengo la mabadiliko hayo ni mikakati yao ya kufanya vizuri katika anga za kimataifa.

“Leo tuna furaha kuwatambulisha rasmi kocha mkuu wa klabu yetu bwana George Lwandamina kutoka Zambia, ambae mmesikia habari zake muda mrefu na leo yupo hapa mbele yenu, lengo letu kubwa ni kufanya vizuri katika michuano ya kimataifa” Alisema Sanga.

“Tunamshukuru kocha Hans kwa muda wote aliofanya kazi kama kocha mkuu na kwa kutambua mchango wake ndiyo maana tumempa jukumu jipya la kuwa mkurugenzi wa ufundi wa klabu yetu” Aliongeza Sanga.

Naye kocha mkuu huyo mpya alisema amekuja kuipa Yanga mwelekeo wa tofauti na yuko tayari kwa ajili ya changamoto zilizopo mbele yake na kwamba atakuwa tayari kushirikiana na uongozi, wanachama na mashabiki wa klabu hiyo ili kusonga mbele.

Hans Van Der Pluijm na George Lwandamina wakikumbatiana leo wakati wa utambulisho wa kocha mpya

“Najua Yanga walifanya vizuri katika msimu uliopita chini ya Hans na wanaendelea kufanya vizuri, lakini mimi nimekuja kuwapa mwelekeo mpya na niko tayari kwa changamoto kwa kuwa hii ni sehemu ya maisha na ili kufikia mafanikio ni lazima upitie changamoto” Alisema Lwandamina.

Akizungumzia juu ya tetesi za usajili kocha huyo alisema hadi hivi sasa hawezi kusema chochote na kwamba hakuna mchezaji aliyeandikiwa kucheza Yanga siku zote lakini pia ataanza na wachezaji waliopo kwenye kikosi cha hivi sasa.

Kuhusiana na falsafa yake katika kufuindisha, Lwandamina alisema yeye hupenda zaidi timu inayomiliki mpira kwa kuwa hiyo ndiyo njia pekee ya kumnyima adui yako uwezekano wa kushinda na kwamba timu inayomiliki mpira ndiyo ndiyo yenye uwezekano wa kushinda.

“Mimi napenda timu inayomiliki mpira na pale tunapoupoteza kila mmoja ni lazima afanye kazi ya ziada kuurejesha katika milki yetu kwakuwa naamini timu inayomiliki mpira ina uwezekano mkubwa zaidi wa kushinda” Alisemma Lwandamina

Yanga Sc inatarajia kuanza mazoezi Jumatatu ya tar 28 mwezi Novemba, kujiweka tayari na mzunguko wa pili wa ligi kuu ya kandanda Tanzania bara “VPL”