WIKI YA KIFO KATIKA LIGI MBALIMBALI BARANI ULAYA

 

wachezaji wanaotarajiwa kung'ara juma hili

Na: Imani Kelvin Mbaga

Baada ya ligi mbalimbali kwenda mapumziko kupisha michezo ya timu za taifa, ratiba ya ligi hizo imerudi tena na mwishoni mwa juma hili kutakuwa na michezo mingi itakayochezwa.

Huko barani Ulaya hususani katika ligi kubwa tano zinazotazamwa na kufuatiliwa na watu wengi zaidi duniani, katika ligi nne hii ni wiki ya kifo ambapo michezo mikubwa inayosubiriwa takribani msimu mzima na mamilioni ya mashabiki inatarajiwa kuchezwa.

Mamilioni ya mashabiki wana hamu kubwa ya kuona ufundi, mbinu, rekodi na hata vituko ikiwa ni pamoja na tambo toka kwa makocha, wachezaji na hata wapenzi wa vilabu vyote.

LIGI YA ENGLAND “EPL”-Manchester United Vs Arsenal

Hapa kutakuwa na mchuano mkali kati ya Manchester United wanaowakaribisha washika bunduki wa jiji la London Arsenal katika uwanja wao wa Old Trafford.

Wachezaji wa Arsenal wakishangilia bao

Mechi hii inachezwa wakati timu hizi zikiwa na nafasi tofauti katika msimamo wa ligi ambapo Arsenal wako katika nafasi ya nne huku Manchester United wakiwa katika nafasi ya sita wakiwa na tofauti ya pointi sita.

Takwimu zinaonyesha kuwa katika michezo mitano iliyopita kwa vilabu hivi kukutana kila timu imeshinda michezo miwili na kutoka sare mchezo mmoja. Lakini ikumbukwe kuwa kocha wa Arsenal Mfaransa Arsene Wenger hajawahi kumfunga kocha wa Manchester United Jose Morinho katika mchezo wowote wa ligi

Wakati takwimu hizo zikishindwa kutoa mwelekeo kila klabu kati ya hivi viwili msimu huu inaonyesha katika michezo mitano ya mwisho katika mashindano yote Manchester United wamepoteza michezo miwili, wameshinda miwili na kutoka sare mchezo mmoja.

Paul Pogba na Jesse Lindgaard wachezaji wa Man Utd

Arsenal kwa upande wao katika michezo mitano iliyopita wametoka sare mbili na kushinda michezo mitatu. Lakini pia toka ligi hii ianze kuchezwa jumla ya michezo 11 imechezwa na Arsenal wamepoteza mchezo mmoja pekee siku ya ufunguzi. Wakati United wameshapoteza mitatu

LIGI YA UJERUMANI “BUNDES LIGA”- Bayern Munchen Vs Borussia Dortmund

Katika Bundes liga mabingwa watetezi Bayern Munchen watasafiri kwenda Signal Iduna Park kuwavaa Borussia Dortmund baada ya michezo kumi ya ligi. Timu hizo zinakutana huku mabingwa hao watetezi, Bayern Munchen wakiwa wanaongoza ligi hiyo baada ya kushinda michezo saba na kutioa sare michezo mitatu wakati wenyejio wao wao Dortmund tayari wameshapoteza michezo miwili na kushinda michezo mitano na sare tatu

Kivutio kikubwa ni takwimu zao zinazoonyesha kuwa Bayern wameshinda jumla ya mechi 20 kati ya mechi 40 walizokutana wakati ambapo Dortmund wameshinda michezo 13 na 7 kati ya hiyo 40 ikiamuliwa kwa sare.

LIGI YA HISPANIA “LA LIGA”

Mechi nyingine yenye mvuto wa kipekee mwishoni mwa juma hili ni mechi kati ya Real Madrid na jirani zao Atletico Madrid mechi itakayochezwa pale Estadio Vicente Calderon uwanja wa nyumbani wa Atletico Madrid.

Atletico Madrid wakiwa na furaha baada ya kufunga goli

Katika miaka ya hivi karibuni upinzani kati ya watani hawa wa jadi umenogeshwa zaidi na namna Atletco Madrid wanavyofanya vizuri katika michuano ya ya ndani na ile ya barani Ulaya kwani katika kipindi cha miaka mitatu watani hawa wa jadi wamekutana mara mbili katika fainali za klabu bingwa barani humo huku mara zote real Madrid wakiibuka kidedea.

Takwimu zinaonyesha kuwa timu hizi zimeshakutana mara 41 wakati ambapo Real Madrid wakionyesha kuwawanyasa sana watani wao kwa kuibuka na ushindi mara 24 dhidi ya mara 7 pekee walizoibuka Atletico na wameshagawana point mara 10.

Real Madrid katika chereko chereko za ushindi

Wanaingia uwanjani baada ya michezo 11 ya ligi ambapo Real wao hawajapoteza mchezo wowote na wameshinda michezo minane na kutoka sare michezo mitatu, na kuongoza ligi wakati watani wao wameshapoteza michezo miwili na katika msimamo wanashikilia nafasi ya 4.

LIGI YA ITALIA “SERIE A”- AC Milan Vs Inter Milan

Ac Milan wakiwa katika nafasi ya 3 ya msimamo wa ligi na tayari msimu huu wameshapoteza michezo mitatu kati ya michezo 12 waliyocheza watakuwa wakiikaribisha Inter Milan ambao katika michezo 12 ya ligi msimu huu tayari wamepoteza michezo mitano na wamejikirta katika nafasi ya 9 ya msimamo wa ligi hiyo.

Ac Milan wakishangilia moja ya mabao waliyofunga

Mchezo huu utachezwa Jumapili katika dimba la uwanja wa San Sirro na tayari timu hizi zimeshakutana mara 34 wakati Ac Milan wakiibuka wababe mara 16 dhidi ya 14 ya watani wao na mara 4 wakigawana pointi.

Bila shaka hii itakuwa ni michezo yenye mvuto licha ya kuathiriwa na uwepo wa majeruhi wengi katika vikosi mbalimbali vya timu zitakazocheza hiyo kesho na kesho kutwa.

Kama kawaida michezo hii inakzikutanisha timu zinazoongozwa na makocha wanaotumia zaidi ufundi dhidi ya timu zinazoongozwa na makocha wanaotumia zaidi mbinu

KOCHA	TIMU(MBINU)	Vs	KOCHA	TIMU(UFUNDI)	UWANJA
JOSE MORINHO	MAN UTD	Vs	ARSENE WENGER	ARSENAL	OLD TRAFFORD
DIEGO SIMEON	ATLETICO MADRID	Vs	ZINEDIN ZIDANE	REAL MADRID	VICENTE CALDERON
THOMAS TUCHEL	BORUSSIA DORTMUND	Vs	CARLO ANCELOTI	BAYERN MUNCHEN	SIGNAL IDUNA PARK
VICENZO MONTELA	AC MILLAN	Vs	STEPHANO PIOLI	INTER MILAN	SAN SIRRO

Hata hivyo timu kama Ac Millan na Inter Millan ziko wakati wa mpito kujaribu kurejesha makali yao ya miaka iliyopita na hivyo inawezekana kabisa mechi yao itakuwa ni mechi itakayotaliwa zaidi na mbinu kwa mabenchi yote mawili ya ufundi kwani lengo namba moja ni kutafuta ushindi kabla ya kuangalia umechezaje.